1 Corinthians 10

1 Corinthians 10:1

nolo enim vos ignorare fratres quoniam patres nostri omnes sub nube fuerunt et omnes mare transierunt

1 Corinthians 10:2

et omnes in Mose baptizati sunt in nube et in mari

1 Corinthians 10:3

et omnes eandem escam spiritalem manducaverunt

1 Corinthians 10:4

et omnes eundem potum spiritalem biberunt bibebant autem de spiritali consequenti eos petra petra autem erat Christus

1 Corinthians 10:5

sed non in pluribus eorum beneplacitum est Deo nam prostrati sunt in deserto

1 Corinthians 10:6

haec autem in figura facta sunt nostri ut non simus concupiscentes malorum sicut et illi concupierunt

1 Corinthians 10:7

neque idolorum cultores efficiamini sicut quidam ex ipsis quemadmodum scriptum est sedit populus manducare et bibere et surrexerunt ludere

1 Corinthians 10:8

neque fornicemur sicut quidam ex ipsis fornicati sunt et ceciderunt una die viginti tria milia

1 Corinthians 10:9

neque temptemus Christum sicut quidam eorum temptaverunt et a serpentibus perierunt

1 Corinthians 10:10

neque murmuraveritis sicut quidam eorum murmuraverunt et perierunt ab exterminatore

1 Corinthians 10:11

haec autem omnia in figura contingebant illis scripta sunt autem ad correptionem nostram in quos fines saeculorum devenerunt

1 Corinthians 10:12

itaque qui se existimat stare videat ne cadat

1 Corinthians 10:13

temptatio vos non adprehendat nisi humana fidelis autem Deus qui non patietur vos temptari super id quod potestis sed faciet cum temptatione etiam proventum ut possitis sustinere

1 Corinthians 10:14

propter quod carissimi mihi fugite ab idolorum cultura

1 Corinthians 10:15

ut prudentibus loquor vos iudicate quod dico

1 Corinthians 10:16

calicem benedictionis cui benedicimus nonne communicatio sanguinis Christi est et panis quem frangimus nonne participatio corporis Domini est

1 Corinthians 10:17

quoniam unus panis unum corpus multi sumus omnes quidem de uno pane participamur

1 Corinthians 10:18

videte Israhel secundum carnem nonne qui edunt hostias participes sunt altaris

1 Corinthians 10:19

quid ergo dico quod idolis immolatum sit aliquid aut quod idolum sit aliquid

1 Corinthians 10:20

sed quae immolant gentes daemoniis immolant et non Deo nolo autem vos socios fieri daemoniorum non potestis calicem Domini bibere et calicem daemoniorum

1 Corinthians 10:21

non potestis mensae Domini participes esse et mensae daemoniorum

1 Corinthians 10:22

an aemulamur Dominum numquid fortiores illo sumus omnia licent sed non omnia expediunt

1 Corinthians 10:23

omnia licent sed non omnia aedificant

1 Corinthians 10:24

nemo quod suum est quaerat sed quod alterius

1 Corinthians 10:25

omne quod in macello venit manducate nihil interrogantes propter conscientiam

1 Corinthians 10:26

Domini est terra et plenitudo eius

1 Corinthians 10:27

si quis vocat vos infidelium et vultis ire omne quod vobis adponitur manducate nihil interrogantes propter conscientiam

1 Corinthians 10:28

si quis autem dixerit hoc immolaticium est idolis nolite manducare propter illum qui indicavit et propter conscientiam

1 Corinthians 10:29

conscientiam autem dico non tuam sed alterius ut quid enim libertas mea iudicatur ab alia conscientia

1 Corinthians 10:30

si ego cum gratia participo quid blasphemor pro eo quod gratias ago

1 Corinthians 10:31

sive ergo manducatis sive bibitis vel aliud quid facitis omnia in gloriam Dei facite

1 Corinthians 10:32

sine offensione estote Iudaeis et gentilibus et ecclesiae Dei

1 Corinthians 10:33

sicut et ego per omnia omnibus placeo non quaerens quod mihi utile est sed quod multis ut salvi fiant