1 Corinthians 11

1 Corinthians 11:1

imitatores mei estote sicut et ego Christi

1 Corinthians 11:2

laudo autem vos fratres quod omnia mei memores estis et sicut tradidi vobis praecepta mea tenetis

1 Corinthians 11:3

volo autem vos scire quod omnis viri caput Christus est caput autem mulieris vir caput vero Christi Deus

1 Corinthians 11:4

omnis vir orans aut prophetans velato capite deturpat caput suum

1 Corinthians 11:5

omnis autem mulier orans aut prophetans non velato capite deturpat caput suum unum est enim atque si decalvetur

1 Corinthians 11:6

nam si non velatur mulier et tondeatur si vero turpe est mulieri tonderi aut decalvari velet caput suum

1 Corinthians 11:7

vir quidem non debet velare caput quoniam imago et gloria est Dei mulier autem gloria viri est

1 Corinthians 11:8

non enim vir ex muliere est sed mulier ex viro

1 Corinthians 11:9

etenim non est creatus vir propter mulierem sed mulier propter virum

1 Corinthians 11:10

ideo debet mulier potestatem habere supra caput propter angelos

1 Corinthians 11:11

verumtamen neque vir sine muliere neque mulier sine viro in Domino

1 Corinthians 11:12

nam sicut mulier de viro ita et vir per mulierem omnia autem ex Deo

1 Corinthians 11:13

vos ipsi iudicate decet mulierem non velatam orare Deum

1 Corinthians 11:14

nec ipsa natura docet vos quod vir quidem si comam nutriat ignominia est illi

1 Corinthians 11:15

mulier vero si comam nutriat gloria est illi quoniam capilli pro velamine ei dati sunt

1 Corinthians 11:16

si quis autem videtur contentiosus esse nos talem consuetudinem non habemus neque ecclesiae Dei

1 Corinthians 11:17

hoc autem praecipio non laudans quod non in melius sed in deterius convenitis

1 Corinthians 11:18

primum quidem convenientibus vobis in ecclesia audio scissuras esse et ex parte credo

1 Corinthians 11:19

nam oportet et hereses esse ut et qui probati sunt manifesti fiant in vobis

1 Corinthians 11:20

convenientibus ergo vobis in unum iam non est dominicam cenam manducare

1 Corinthians 11:21

unusquisque enim suam cenam praesumit ad manducandum et alius quidem esurit alius autem ebrius est

1 Corinthians 11:22

numquid domos non habetis ad manducandum et bibendum aut ecclesiam Dei contemnitis et confunditis eos qui non habent quid dicam vobis laudo vos in hoc non laudo

1 Corinthians 11:23

ego enim accepi a Domino quod et tradidi vobis quoniam Dominus Iesus in qua nocte tradebatur accepit panem

1 Corinthians 11:24

et gratias agens fregit et dixit hoc est corpus meum pro vobis hoc facite in meam commemorationem

1 Corinthians 11:25

similiter et calicem postquam cenavit dicens hic calix novum testamentum est in meo sanguine hoc facite quotienscumque bibetis in meam commemorationem

1 Corinthians 11:26

quotienscumque enim manducabitis panem hunc et calicem bibetis mortem Domini adnuntiatis donec veniat

1 Corinthians 11:27

itaque quicumque manducaverit panem vel biberit calicem Domini indigne reus erit corporis et sanguinis Domini

1 Corinthians 11:28

probet autem se ipsum homo et sic de pane illo edat et de calice bibat

1 Corinthians 11:29

qui enim manducat et bibit indigne iudicium sibi manducat et bibit non diiudicans corpus

1 Corinthians 11:30

ideo inter vos multi infirmes et inbecilles et dormiunt multi

1 Corinthians 11:31

quod si nosmet ipsos diiudicaremus non utique iudicaremur

1 Corinthians 11:32

dum iudicamur autem a Domino corripimur ut non cum hoc mundo damnemur

1 Corinthians 11:33

itaque fratres mei cum convenitis ad manducandum invicem expectate

1 Corinthians 11:34

si quis esurit domi manducet ut non in iudicium conveniatis cetera autem cum venero disponam