1 Corinthians 12

1 Corinthians 12:1

de spiritalibus autem nolo vos ignorare fratres

1 Corinthians 12:2

scitis quoniam cum gentes essetis ad simulacra muta prout ducebamini euntes

1 Corinthians 12:3

ideo notum vobis facio quod nemo in Spiritu Dei loquens dicit anathema Iesu et nemo potest dicere Dominus Iesus nisi in Spiritu Sancto

1 Corinthians 12:4

divisiones vero gratiarum sunt idem autem Spiritus

1 Corinthians 12:5

et divisiones ministrationum sunt idem autem Dominus

1 Corinthians 12:6

et divisiones operationum sunt idem vero Deus qui operatur omnia in omnibus

1 Corinthians 12:7

unicuique autem datur manifestatio Spiritus ad utilitatem

1 Corinthians 12:8

alii quidem per Spiritum datur sermo sapientiae alii autem sermo scientiae secundum eundem Spiritum

1 Corinthians 12:9

alteri fides in eodem Spiritu alii gratia sanitatum in uno Spiritu

1 Corinthians 12:10

alii operatio virtutum alii prophetatio alii discretio spirituum alii genera linguarum alii interpretatio sermonum

1 Corinthians 12:11

haec autem omnia operatur unus atque idem Spiritus dividens singulis prout vult

1 Corinthians 12:12

sicut enim corpus unum est et membra habet multa omnia autem membra corporis cum sint multa unum corpus sunt ita et Christus

1 Corinthians 12:13

etenim in uno Spiritu omnes nos in unum corpus baptizati sumus sive Iudaei sive gentiles sive servi sive liberi et omnes unum Spiritum potati sumus

1 Corinthians 12:14

nam et corpus non est unum membrum sed multa

1 Corinthians 12:15

si dixerit pes quoniam non sum manus non sum de corpore non ideo non est de corpore

1 Corinthians 12:16

et si dixerit auris quia non sum oculus non sum de corpore non ideo non est de corpore

1 Corinthians 12:17

si totum corpus oculus ubi auditus si totum auditus ubi odoratus

1 Corinthians 12:18

nunc autem posuit Deus membra unumquodque eorum in corpore sicut voluit

1 Corinthians 12:19

quod si essent omnia unum membrum ubi corpus

1 Corinthians 12:20

nunc autem multa quidem membra unum autem corpus

1 Corinthians 12:21

non potest dicere oculus manui opera tua non indigeo aut iterum caput pedibus non estis mihi necessarii

1 Corinthians 12:22

sed multo magis quae videntur membra corporis infirmiora esse necessariora sunt

1 Corinthians 12:23

et quae putamus ignobiliora membra esse corporis his honorem abundantiorem circumdamus et quae inhonesta sunt nostra abundantiorem honestatem habent

1 Corinthians 12:24

honesta autem nostra nullius egent sed Deus temperavit corpus ei cui deerat abundantiorem tribuendo honorem

1 Corinthians 12:25

ut non sit scisma in corpore sed id ipsum pro invicem sollicita sint membra

1 Corinthians 12:26

et si quid patitur unum membrum conpatiuntur omnia membra sive gloriatur unum membrum congaudent omnia membra

1 Corinthians 12:27

vos autem estis corpus Christi et membra de membro

1 Corinthians 12:28

et quosdam quidem posuit Deus in ecclesia primum apostolos secundo prophetas tertio doctores deinde virtutes exin gratias curationum opitulationes gubernationes genera linguarum

1 Corinthians 12:29

numquid omnes apostoli numquid omnes prophetae numquid omnes doctores

1 Corinthians 12:30

numquid omnes virtutes numquid omnes gratiam habent curationum numquid omnes linguis loquuntur numquid omnes interpretantur

1 Corinthians 12:31

aemulamini autem charismata maiora et adhuc excellentiorem viam vobis demonstro