1 Corinthians 3

1 Corinthians 3:1

et ego fratres non potui vobis loqui quasi spiritalibus sed quasi carnalibus tamquam parvulis in Christo

1 Corinthians 3:2

lac vobis potum dedi non escam nondum enim poteratis sed ne nunc quidem potestis adhuc enim estis carnales

1 Corinthians 3:3

cum enim sit inter vos zelus et contentio nonne carnales estis et secundum hominem ambulatis

1 Corinthians 3:4

cum enim quis dicit ego quidem sum Pauli alius autem ego Apollo nonne homines estis quid igitur est Apollo quid vero Paulus

1 Corinthians 3:5

ministri eius cui credidistis et unicuique sicut Dominus dedit

1 Corinthians 3:6

ego plantavi Apollo rigavit sed Deus incrementum dedit

1 Corinthians 3:7

itaque neque qui plantat est aliquid neque qui rigat sed qui incrementum dat Deus

1 Corinthians 3:8

qui plantat autem et qui rigat unum sunt unusquisque autem propriam mercedem accipiet secundum suum laborem

1 Corinthians 3:9

Dei enim sumus adiutores Dei agricultura estis Dei aedificatio estis

1 Corinthians 3:10

secundum gratiam Dei quae data est mihi ut sapiens architectus fundamentum posui alius autem superaedificat unusquisque autem videat quomodo superaedificet

1 Corinthians 3:11

fundamentum enim aliud nemo potest ponere praeter id quod positum est qui est Christus Iesus

1 Corinthians 3:12

si quis autem superaedificat supra fundamentum hoc aurum argentum lapides pretiosos ligna faenum stipulam

1 Corinthians 3:13

uniuscuiusque opus manifestum erit dies enim declarabit quia in igne revelabitur et uniuscuiusque opus quale sit ignis probabit

1 Corinthians 3:14

si cuius opus manserit quod superaedificavit mercedem accipiet

1 Corinthians 3:15

si cuius opus arserit detrimentum patietur ipse autem salvus erit sic tamen quasi per ignem

1 Corinthians 3:16

nescitis quia templum Dei estis et Spiritus Dei habitat in vobis

1 Corinthians 3:17

si quis autem templum Dei violaverit disperdet illum Deus templum enim Dei sanctum est quod estis vos

1 Corinthians 3:18

nemo se seducat si quis videtur inter vos sapiens esse in hoc saeculo stultus fiat ut sit sapiens

1 Corinthians 3:19

sapientia enim huius mundi stultitia est apud Deum scriptum est enim conprehendam sapientes in astutia eorum

1 Corinthians 3:20

et iterum Dominus novit cogitationes sapientium quoniam vanae sunt

1 Corinthians 3:21

itaque nemo glorietur in hominibus omnia enim vestra sunt

1 Corinthians 3:22

sive Paulus sive Apollo sive Cephas sive mundus sive vita sive mors sive praesentia sive futura omnia enim vestra sunt

1 Corinthians 3:23

vos autem Christi Christus autem Dei