1 Thessalonians 2

1 Thessalonians 2:1

nam ipsi scitis fratres introitum nostrum ad vos quia non inanis fuit

1 Thessalonians 2:2

sed ante passi et contumeliis affecti sicut scitis in Philippis fiduciam habuimus in Deo nostro loqui ad vos evangelium Dei in multa sollicitudine

1 Thessalonians 2:3

exhortatio enim nostra non de errore neque de inmunditia neque in dolo

1 Thessalonians 2:4

sed sicut probati sumus a Deo ut crederetur nobis evangelium ita loquimur non quasi hominibus placentes sed Deo qui probat corda nostra

1 Thessalonians 2:5

neque enim aliquando fuimus in sermone adulationis sicut scitis neque in occasione avaritiae Deus testis est

1 Thessalonians 2:6

nec quaerentes ab hominibus gloriam neque a vobis neque ab aliis

1 Thessalonians 2:7

cum possimus oneri esse ut Christi apostoli sed facti sumus lenes in medio vestrum tamquam si nutrix foveat filios suos

1 Thessalonians 2:8

ita desiderantes vos cupide volebamus tradere vobis non solum evangelium Dei sed etiam animas nostras quoniam carissimi nobis facti estis

1 Thessalonians 2:9

memores enim estis fratres laborem nostrum et fatigationem nocte et die operantes ne quem vestrum gravaremus praedicavimus in vobis evangelium Dei

1 Thessalonians 2:10

vos testes estis et Deus quam sancte et iuste et sine querella vobis qui credidistis fuimus

1 Thessalonians 2:11

sicut scitis qualiter unumquemque vestrum tamquam pater filios suos

1 Thessalonians 2:12

deprecantes vos et consolantes testificati sumus ut ambularetis digne Deo qui vocavit vos in suum regnum et gloriam

1 Thessalonians 2:13

ideo et nos gratias agimus Deo sine intermissione quoniam cum accepissetis a nobis verbum auditus Dei accepistis non ut verbum hominum sed sicut est vere verbum Dei qui operatur in vobis qui credidistis

1 Thessalonians 2:14

vos enim imitatores facti estis fratres ecclesiarum Dei quae sunt in Iudaea in Christo Iesu quia eadem passi estis et vos a contribulibus vestris sicut et ipsi a Iudaeis

1 Thessalonians 2:15

qui et Dominum occiderunt Iesum et prophetas et nos persecuti sunt et Deo non placent et omnibus hominibus adversantur

1 Thessalonians 2:16

prohibentes nos gentibus loqui ut salvae fiant ut impleant peccata sua semper praevenit autem ira Dei super illos usque in finem

1 Thessalonians 2:17

nos autem fratres desolati a vobis ad tempus horae aspectu non corde abundantius festinavimus faciem vestram videre cum multo desiderio

1 Thessalonians 2:18

quoniam voluimus venire ad vos ego quidem Paulus et semel et iterum et inpedivit nos Satanas

1 Thessalonians 2:19

quae est enim nostra spes aut gaudium aut corona gloriae nonne vos ante Dominum nostrum Iesum estis in adventu eius

1 Thessalonians 2:20

vos enim estis gloria nostra et gaudium