1 Timothy 4

1 Timothy 4:1

Spiritus autem manifeste dicit quia in novissimis temporibus discedent quidam a fide adtendentes spiritibus erroris et doctrinis daemoniorum

1 Timothy 4:2

in hypocrisi loquentium mendacium et cauteriatam habentium suam conscientiam

1 Timothy 4:3

prohibentium nubere abstinere a cibis quos Deus creavit ad percipiendum cum gratiarum actione fidelibus et his qui cognoverunt veritatem

1 Timothy 4:4

quia omnis creatura Dei bona et nihil reiciendum quod cum gratiarum actione percipitur

1 Timothy 4:5

sanctificatur enim per verbum Dei et orationem

1 Timothy 4:6

haec proponens fratribus bonus eris minister Christi Iesu enutritus verbis fidei et bonae doctrinae quam adsecutus es

1 Timothy 4:7

ineptas autem et aniles fabulas devita exerce te ipsum ad pietatem

1 Timothy 4:8

nam corporalis exercitatio ad modicum utilis est pietas autem ad omnia utilis est promissionem habens vitae quae nunc est et futurae

1 Timothy 4:9

fidelis sermo et omni acceptione dignus

1 Timothy 4:10

in hoc enim laboramus et maledicimur quia speravimus in Deum vivum qui est salvator omnium hominum maxime fidelium

1 Timothy 4:11

praecipe haec et doce

1 Timothy 4:12

nemo adulescentiam tuam contemnat sed exemplum esto fidelium in verbo in conversatione in caritate in fide in castitate

1 Timothy 4:13

dum venio adtende lectioni exhortationi doctrinae

1 Timothy 4:14

noli neglegere gratiam quae in te est quae data est tibi per prophetiam cum inpositione manuum presbyterii

1 Timothy 4:15

haec meditare in his esto ut profectus tuus manifestus sit omnibus

1 Timothy 4:16

adtende tibi et doctrinae insta in illis hoc enim faciens et te ipsum salvum facies et qui te audiunt