2 Chronicles 27

2 Chronicles 27:1

viginti quinque annorum erat Ioatham cum regnare coepisset et sedecim annis regnavit in Hierusalem nomen matris eius Hierusa filia Sadoc

2 Chronicles 27:2

fecitque quod rectum erat coram Domino iuxta omnia quae fecerat Ozias pater suus excepto quod non est ingressus templum Domini et adhuc populus delinquebat

2 Chronicles 27:3

ipse aedificavit portam domus Domini Excelsam et in muro Ophel multa construxit

2 Chronicles 27:4

urbes quoque aedificavit in montibus Iuda et in saltibus castella et turres

2 Chronicles 27:5

ipse pugnavit contra regem filiorum Ammon et vicit eos dederuntque ei filii Ammon in tempore illo centum talenta argenti et decem milia choros tritici ac totidem choros hordei haec ei praebuerunt filii Ammon in anno secundo et tertio

2 Chronicles 27:6

corroboratusque est Ioatham eo quod direxisset vias suas coram Domino Deo suo

2 Chronicles 27:7

reliqua autem sermonum Ioatham et omnes pugnae eius et opera scripta sunt in libro regum Israhel et Iuda

2 Chronicles 27:8

viginti quinque annorum erat cum regnare coepisset et sedecim annis regnavit in Hierusalem

2 Chronicles 27:9

dormivitque Ioatham cum patribus suis et sepelierunt eum in civitate David et regnavit Achaz filius eius pro eo