2 Corinthians 11

2 Corinthians 11:1

utinam sustineretis modicum quid insipientiae meae sed et subportate me

2 Corinthians 11:2

aemulor enim vos Dei aemulatione despondi enim vos uni viro virginem castam exhibere Christo

2 Corinthians 11:3

timeo autem ne sicut serpens Evam seduxit astutia sua ita corrumpantur sensus vestri et excidant a simplicitate quae est in Christo

2 Corinthians 11:4

nam si is qui venit alium Christum praedicat quem non praedicavimus aut alium spiritum accipitis quem non accepistis aut aliud evangelium quod non recepistis recte pateremini

2 Corinthians 11:5

existimo enim nihil me minus fecisse magnis apostolis

2 Corinthians 11:6

et si inperitus sermone sed non scientia in omnibus autem manifestatus sum vobis

2 Corinthians 11:7

aut numquid peccatum feci me ipsum humilians ut vos exaltemini quoniam gratis evangelium Dei evangelizavi vobis

2 Corinthians 11:8

alias ecclesias expoliavi accipiens stipendium ad ministerium vestrum

2 Corinthians 11:9

et cum essem apud vos et egerem nulli onerosus fui nam quod mihi deerat suppleverunt fratres qui venerunt a Macedonia et in omnibus sine onere me vobis servavi et servabo

2 Corinthians 11:10

est veritas Christi in me quoniam haec gloria non infringetur in me in regionibus Achaiae

2 Corinthians 11:11

quare quia non diligo vos Deus scit

2 Corinthians 11:12

quod autem facio et faciam ut amputem occasionem eorum qui volunt occasionem ut in quo gloriantur inveniantur sicut et nos

2 Corinthians 11:13

nam eiusmodi pseudoapostoli operarii subdoli transfigurantes se in apostolos Christi

2 Corinthians 11:14

et non mirum ipse enim Satanas transfigurat se in angelum lucis

2 Corinthians 11:15

non est ergo magnum si ministri eius transfigurentur velut ministri iustitiae quorum finis erit secundum opera ipsorum

2 Corinthians 11:16

iterum dico ne quis me putet insipientem alioquin velut insipientem accipite me ut et ego modicum quid glorier

2 Corinthians 11:17

quod loquor non loquor secundum Dominum sed quasi in insipientia in hac substantia gloriae

2 Corinthians 11:18

quoniam multi gloriantur secundum carnem et ego gloriabor

2 Corinthians 11:19

libenter enim suffertis insipientes cum sitis ipsi sapientes

2 Corinthians 11:20

sustinetis enim si quis vos in servitutem redigit si quis devorat si quis accipit si quis extollitur si quis in faciem vos caedit

2 Corinthians 11:21

secundum ignobilitatem dico quasi nos infirmi fuerimus in quo quis audet in insipientia dico audeo et ego

2 Corinthians 11:22

Hebraei sunt et ego Israhelitae sunt et ego semen Abrahae sunt et ego

2 Corinthians 11:23

ministri Christi sunt minus sapiens dico plus ego in laboribus plurimis in carceribus abundantius in plagis supra modum in mortibus frequenter

2 Corinthians 11:24

a Iudaeis quinquies quadragenas una minus accepi

2 Corinthians 11:25

ter virgis caesus sum semel lapidatus sum ter naufragium feci nocte et die in profundo maris fui

2 Corinthians 11:26

in itineribus saepe periculis fluminum periculis latronum periculis ex genere periculis ex gentibus periculis in civitate periculis in solitudine periculis in mari periculis in falsis fratribus

2 Corinthians 11:27

in labore et aerumna in vigiliis multis in fame et siti in ieiuniis multis in frigore et nuditate

2 Corinthians 11:28

praeter illa quae extrinsecus sunt instantia mea cotidiana sollicitudo omnium ecclesiarum

2 Corinthians 11:29

quis infirmatur et non infirmor quis scandalizatur et ego non uror

2 Corinthians 11:30

si gloriari oportet quae infirmitatis meae sunt gloriabor

2 Corinthians 11:31

Deus et Pater Domini Iesu scit qui est benedictus in saecula quod non mentior

2 Corinthians 11:32

Damasci praepositus gentis Aretae regis custodiebat civitatem Damascenorum ut me conprehenderet

2 Corinthians 11:33

et per fenestram in sporta dimissus sum per murum et effugi manus eius