2 Corinthians 3

2 Corinthians 3:1

incipimus iterum nosmet ipsos commendare aut numquid egemus sicut quidam commendaticiis epistulis ad vos aut ex vobis

2 Corinthians 3:2

epistula nostra vos estis scripta in cordibus nostris quae scitur et legitur ab omnibus hominibus

2 Corinthians 3:3

manifestati quoniam epistula estis Christi ministrata a nobis et scripta non atramento sed Spiritu Dei vivi non in tabulis lapideis sed in tabulis cordis carnalibus

2 Corinthians 3:4

fiduciam autem talem habemus per Christum ad Deum

2 Corinthians 3:5

non quod sufficientes simus cogitare aliquid a nobis quasi ex nobis sed sufficientia nostra ex Deo est

2 Corinthians 3:6

qui et idoneos nos fecit ministros novi testamenti non litterae sed Spiritus littera enim occidit Spiritus autem vivificat

2 Corinthians 3:7

quod si ministratio mortis litteris deformata in lapidibus fuit in gloria ita ut non possent intendere filii Israhel in faciem Mosi propter gloriam vultus eius quae evacuatur

2 Corinthians 3:8

quomodo non magis ministratio Spiritus erit in gloria

2 Corinthians 3:9

nam si ministratio damnationis gloria est multo magis abundat ministerium iustitiae in gloria

2 Corinthians 3:10

nam nec glorificatum est quod claruit in hac parte propter excellentem gloriam

2 Corinthians 3:11

si enim quod evacuatur per gloriam est multo magis quod manet in gloria est

2 Corinthians 3:12

habentes igitur talem spem multa fiducia utimur

2 Corinthians 3:13

et non sicut Moses ponebat velamen super faciem suam ut non intenderent filii Israhel in faciem eius quod evacuatur

2 Corinthians 3:14

sed obtusi sunt sensus eorum usque in hodiernum enim diem id ipsum velamen in lectione veteris testamenti manet non revelatum quoniam in Christo evacuatur

2 Corinthians 3:15

sed usque in hodiernum diem cum legitur Moses velamen est positum super cor eorum

2 Corinthians 3:16

cum autem conversus fuerit ad Deum aufertur velamen

2 Corinthians 3:17

Dominus autem Spiritus est ubi autem Spiritus Domini ibi libertas

2 Corinthians 3:18

nos vero omnes revelata facie gloriam Domini speculantes in eandem imaginem transformamur a claritate in claritatem tamquam a Domini Spiritu