2 Peter 1

2 Peter 1:1

Simon Petrus servus et apostolus Iesu Christi his qui coaequalem nobis sortiti sunt fidem in iustitia Dei nostri et salvatoris Iesu Christi

2 Peter 1:2

gratia vobis et pax adimpleatur in cognitione Domini nostri

2 Peter 1:3

quomodo omnia nobis divinae virtutis suae quae ad vitam et pietatem donata est per cognitionem eius qui vocavit nos propria gloria et virtute

2 Peter 1:4

per quae maxima et pretiosa nobis promissa donavit ut per haec efficiamini divinae consortes naturae fugientes eius quae in mundo est concupiscentiae corruptionem

2 Peter 1:5

vos autem curam omnem subinferentes ministrate in fide vestra virtutem in virtute autem scientiam

2 Peter 1:6

in scientia autem abstinentiam in abstinentia autem patientiam in patientia autem pietatem

2 Peter 1:7

in pietate autem amorem fraternitatis in amore autem fraternitatis caritatem

2 Peter 1:8

haec enim vobis cum adsint et superent non vacuos nec sine fructu vos constituent in Domini nostri Iesu Christi cognitione

2 Peter 1:9

cui enim non praesto sunt haec caecus est et manu temptans oblivionem accipiens purgationis veterum suorum delictorum

2 Peter 1:10

quapropter fratres magis satagite ut per bona opera certam vestram vocationem et electionem faciatis haec enim facientes non peccabitis aliquando

2 Peter 1:11

sic enim abundanter ministrabitur vobis introitus in aeternum regnum Domini nostri et salvatoris Iesu Christi

2 Peter 1:12

propter quod incipiam vos semper commonere de his et quidem scientes et confirmatos in praesenti veritate

2 Peter 1:13

iustum autem arbitror quamdiu sum in hoc tabernaculo suscitare vos in commonitione

2 Peter 1:14

certus quod velox est depositio tabernaculi mei secundum quod et Dominus noster Iesus Christus significavit mihi

2 Peter 1:15

dabo autem operam et frequenter habere vos post obitum meum ut horum memoriam faciatis

2 Peter 1:16

non enim doctas fabulas secuti notam fecimus vobis Domini nostri Iesu Christi virtutem et praesentiam sed speculatores facti illius magnitudinis

2 Peter 1:17

accipiens enim a Deo Patre honorem et gloriam voce delapsa ad eum huiuscemodi a magnifica gloria hic est Filius meus dilectus in quo mihi conplacui

2 Peter 1:18

et hanc vocem nos audivimus de caelo adlatam cum essemus cum ipso in monte sancto

2 Peter 1:19

et habemus firmiorem propheticum sermonem cui bene facitis adtendentes quasi lucernae lucenti in caliginoso loco donec dies inlucescat et lucifer oriatur in cordibus vestris

2 Peter 1:20

hoc primum intellegentes quod omnis prophetia scripturae propria interpretatione non fit

2 Peter 1:21

non enim voluntate humana adlata est aliquando prophetia sed Spiritu Sancto inspirati locuti sunt sancti Dei homines