2 Peter 3

2 Peter 3:1

hanc ecce vobis carissimi secundam scribo epistulam in quibus excito vestram in commonitione sinceram mentem

2 Peter 3:2

ut memores sitis eorum quae praedixi verborum a sanctis prophetis et apostolorum vestrorum praeceptorum Domini et salvatoris

2 Peter 3:3

hoc primum scientes quod venient in novissimis diebus in deceptione inlusores iuxta proprias concupiscentias ambulantes

2 Peter 3:4

dicentes ubi est promissio aut adventus eius ex quo enim patres dormierunt omnia sic perseverant ab initio creaturae

2 Peter 3:5

latet enim eos hoc volentes quod caeli erant prius et terra de aqua et per aquam consistens Dei verbo

2 Peter 3:6

per quae ille tunc mundus aqua inundatus periit

2 Peter 3:7

caeli autem qui nunc sunt et terra eodem verbo repositi sunt igni servati in diem iudicii et perditionis impiorum hominum

2 Peter 3:8

unum vero hoc non lateat vos carissimi quia unus dies apud Dominum sicut mille anni et mille anni sicut dies unus

2 Peter 3:9

non tardat Dominus promissi sed patienter agit propter vos nolens aliquos perire sed omnes ad paenitentiam reverti

2 Peter 3:10

adveniet autem dies Domini ut fur in qua caeli magno impetu transient elementa vero calore solventur

2 Peter 3:11

cum haec igitur omnia dissolvenda sint quales oportet esse vos in sanctis conversationibus et pietatibus

2 Peter 3:12

expectantes et properantes in adventum Dei diei per quam caeli ardentes solventur et elementa ignis ardore tabescent

2 Peter 3:13

novos vero caelos et novam terram et promissa ipsius expectamus in quibus iustitia habitat

2 Peter 3:14

propter quod carissimi haec expectantes satis agite inmaculati et inviolati ei inveniri in pace

2 Peter 3:15

et Domini nostri longanimitatem salutem arbitramini sicut et carissimus frater noster Paulus secundum datam sibi sapientiam scripsit vobis

2 Peter 3:16

sicut et in omnibus epistulis loquens in eis de his in quibus sunt quaedam difficilia intellectu quae indocti et instabiles depravant sicut et ceteras scripturas ad suam ipsorum perditionem

2 Peter 3:17

vos igitur fratres praescientes custodite ne insipientium errore transducti excidatis a propria firmitate

2 Peter 3:18

crescite vero in gratia et in cognitione Domini nostri et salvatoris Iesu Christi ipsi gloria et nunc et in die aeternitatis amen