2 Samuel 22

2 Samuel 22:1

locutus est autem David Domino verba carminis huius in die qua liberavit eum Dominus de manu omnium inimicorum suorum et de manu Saul

2 Samuel 22:2

et ait Dominus petra mea et robur meum et salvator meus

2 Samuel 22:3

Deus meus fortis meus sperabo in eum scutum meum et cornu salutis meae elevator meus et refugium meum salvator meus de iniquitate liberabis me

2 Samuel 22:4

laudabilem invocabo Dominum et ab inimicis meis salvus ero

2 Samuel 22:5

quia circumdederunt me contritiones mortis torrentes Belial terruerunt me

2 Samuel 22:6

funes inferi circumdederunt me praevenerunt me laquei mortis

2 Samuel 22:7

in tribulatione mea invocabo Dominum et ad Deum meum clamabo et exaudiet de templo suo vocem meam et clamor meus veniet ad aures eius

2 Samuel 22:8

commota est et contremuit terra fundamenta montium concussa sunt et conquassata quoniam iratus est

2 Samuel 22:9

ascendit fumus de naribus eius et ignis de ore eius voravit carbones incensi sunt ab eo

2 Samuel 22:10

et inclinavit caelos et descendit et caligo sub pedibus eius

2 Samuel 22:11

et ascendit super cherubin et volavit et lapsus est super pinnas venti

2 Samuel 22:12

posuit tenebras in circuitu suo latibulum cribrans aquas de nubibus caelorum

2 Samuel 22:13

prae fulgore in conspectu eius succensi sunt carbones ignis

2 Samuel 22:14

tonabit de caelis Dominus et Excelsus dabit vocem suam

2 Samuel 22:15

misit sagittas et dissipavit eos fulgur et consumpsit eos

2 Samuel 22:16

et apparuerunt effusiones maris et revelata sunt fundamenta orbis ab increpatione Domini ab inspiratione spiritus furoris eius

2 Samuel 22:17

misit de excelso et adsumpsit me extraxit me de aquis multis

2 Samuel 22:18

liberavit me ab inimico meo potentissimo ab his qui oderant me quoniam robustiores me erant

2 Samuel 22:19

praevenit me in die adflictionis meae et factus est Dominus firmamentum meum

2 Samuel 22:20

et eduxit me in latitudinem liberavit me quia placuit ei

2 Samuel 22:21

retribuet mihi Dominus secundum iustitiam meam et secundum munditiam manuum mearum reddet mihi

2 Samuel 22:22

quia custodivi vias Domini et non egi impie a Deo meo

2 Samuel 22:23

omnia enim iudicia eius in conspectu meo et praecepta eius non amovi a me

2 Samuel 22:24

et ero perfectus cum eo et custodiam me ab iniquitate mea

2 Samuel 22:25

et restituet Dominus mihi secundum iustitiam meam et secundum munditiam manuum mearum in conspectu oculorum suorum

2 Samuel 22:26

cum sancto sanctus eris et cum robusto perfectus

2 Samuel 22:27

cum electo electus eris et cum perverso perverteris

2 Samuel 22:28

et populum pauperem salvum facies oculisque tuis excelsos humiliabis

2 Samuel 22:29

quia tu lucerna mea Domine et Domine inluminabis tenebras meas

2 Samuel 22:30

in te enim curram accinctus in Deo meo transiliam murum

2 Samuel 22:31

Deus inmaculata via eius eloquium Domini igne examinatum scutum est omnium sperantium in se

2 Samuel 22:32

quis est deus praeter Dominum et quis fortis praeter Deum nostrum

2 Samuel 22:33

Deus qui accingit me fortitudine et conplanavit perfectam viam meam

2 Samuel 22:34

coaequans pedes meos cervis et super excelsa mea statuens me

2 Samuel 22:35

docens manus meas ad proelium et conponens quasi arcum aereum brachia mea

2 Samuel 22:36

dedisti mihi clypeum salutis tuae et mansuetudo mea multiplicavit me

2 Samuel 22:37

dilatabis gressus meos subtus me et non deficient tali mei

2 Samuel 22:38

persequar inimicos meos et conteram et non revertar donec consumam eos

2 Samuel 22:39

consumam eos et confringam ut non consurgant cadent sub pedibus meis

2 Samuel 22:40

accinxisti me fortitudine ad proelium incurvabis resistentes mihi sub me

2 Samuel 22:41

inimicos meos dedisti mihi dorsum odientes me et disperdam eos

2 Samuel 22:42

clamabunt et non erit qui salvet ad Dominum et non exaudiet eos

2 Samuel 22:43

delebo eos ut pulverem terrae quasi lutum platearum comminuam eos atque conpingam

2 Samuel 22:44

salvabis me a contradictionibus populi mei custodies in caput gentium populus quem ignoro serviet mihi

2 Samuel 22:45

filii alieni resistent mihi auditu auris oboedient mihi

2 Samuel 22:46

filii alieni defluxerunt et contrahentur in angustiis suis

2 Samuel 22:47

vivit Dominus et benedictus Deus meus et exaltabitur Deus fortis salutis meae

2 Samuel 22:48

Deus qui das vindictas mihi et deicis populos sub me

2 Samuel 22:49

qui educis me ab inimicis meis et a resistentibus mihi elevas me a viro iniquo liberabis me

2 Samuel 22:50

propterea confitebor tibi Domine in gentibus et nomini tuo cantabo

2 Samuel 22:51

magnificanti salutes regis sui et facienti misericordiam christo suo David et semini eius in sempiternum