2 Thessalonians 2

2 Thessalonians 2:1

rogamus autem vos fratres per adventum Domini nostri Iesu Christi et nostrae congregationis in ipsum

2 Thessalonians 2:2

ut non cito moveamini a sensu neque terreamini neque per spiritum neque per sermonem neque per epistulam tamquam per nos quasi instet dies Domini

2 Thessalonians 2:3

ne quis vos seducat ullo modo quoniam nisi venerit discessio primum et revelatus fuerit homo peccati filius perditionis

2 Thessalonians 2:4

qui adversatur et extollitur supra omne quod dicitur Deus aut quod colitur ita ut in templo Dei sedeat ostendens se quia sit Deus

2 Thessalonians 2:5

non retinetis quod cum adhuc essem apud vos haec dicebam vobis

2 Thessalonians 2:6

et nunc quid detineat scitis ut reveletur in suo tempore

2 Thessalonians 2:7

nam mysterium iam operatur iniquitatis tantum ut qui tenet nunc donec de medio fiat

2 Thessalonians 2:8

et tunc revelabitur ille iniquus quem Dominus Iesus interficiet spiritu oris sui et destruet inlustratione adventus sui

2 Thessalonians 2:9

eum cuius est adventus secundum operationem Satanae in omni virtute et signis et prodigiis mendacibus

2 Thessalonians 2:10

et in omni seductione iniquitatis his qui pereunt eo quod caritatem veritatis non receperunt ut salvi fierent

2 Thessalonians 2:11

ideo mittit illis Deus operationem erroris ut credant mendacio

2 Thessalonians 2:12

ut iudicentur omnes qui non crediderunt veritati sed consenserunt iniquitati

2 Thessalonians 2:13

nos autem debemus gratias agere Deo semper pro vobis fratres dilecti a Deo quod elegerit nos Deus primitias in salutem in sanctificatione Spiritus et fide veritatis

2 Thessalonians 2:14

ad quod et vocavit vos per evangelium nostrum in adquisitionem gloriae Domini nostri Iesu Christi

2 Thessalonians 2:15

itaque fratres state et tenete traditiones quas didicistis sive per sermonem sive per epistulam nostram

2 Thessalonians 2:16

ipse autem Dominus noster Iesus Christus et Deus et Pater noster qui dilexit nos et dedit consolationem aeternam et spem bonam in gratia

2 Thessalonians 2:17

exhortetur corda vestra et confirmet in omni opere et sermone bono