2 Timothy 2

2 Timothy 2:1

tu ergo fili mi confortare in gratia quae est in Christo Iesu

2 Timothy 2:2

et quae audisti a me per multos testes haec commenda fidelibus hominibus qui idonei erunt et alios docere

2 Timothy 2:3

labora sicut bonus miles Christi Iesu

2 Timothy 2:4

nemo militans inplicat se negotiis saecularibus ut ei placeat cui se probavit

2 Timothy 2:5

nam et qui certat in agone non coronatur nisi legitime certaverit

2 Timothy 2:6

laborantem agricolam oportet primum de fructibus accipere

2 Timothy 2:7

intellege quae dico dabit enim tibi Dominus in omnibus intellectum

2 Timothy 2:8

memor esto Iesum Christum resurrexisse a mortuis ex semine David secundum evangelium meum

2 Timothy 2:9

in quo laboro usque ad vincula quasi male operans sed verbum Dei non est alligatum

2 Timothy 2:10

ideo omnia sustineo propter electos ut et ipsi salutem consequantur quae est in Christo Iesu cum gloria caelesti

2 Timothy 2:11

fidelis sermo nam si conmortui sumus et convivemus

2 Timothy 2:12

si sustinemus et conregnabimus si negabimus et ille negabit nos

2 Timothy 2:13

si non credimus ille fidelis manet negare se ipsum non potest

2 Timothy 2:14

haec commone testificans coram Domino noli verbis contendere in nihil utile ad subversionem audientium

2 Timothy 2:15

sollicite cura te ipsum probabilem exhibere Deo operarium inconfusibilem recte tractantem verbum veritatis

2 Timothy 2:16

profana autem inaniloquia devita multum enim proficient ad impietatem

2 Timothy 2:17

et sermo eorum ut cancer serpit ex quibus est Hymeneus et Philetus

2 Timothy 2:18

qui a veritate exciderunt dicentes resurrectionem iam factam et subvertunt quorundam fidem

2 Timothy 2:19

sed firmum fundamentum Dei stetit habens signaculum hoc cognovit Dominus qui sunt eius et discedat ab iniquitate omnis qui nominat nomen Domini

2 Timothy 2:20

in magna autem domo non solum sunt vasa aurea et argentea sed et lignea et fictilia et quaedam quidem in honorem quaedam autem in contumeliam

2 Timothy 2:21

si quis ergo emundaverit se ab istis erit vas in honorem sanctificatum et utile Domino ad omne opus bonum paratum

2 Timothy 2:22

iuvenilia autem desideria fuge sectare vero iustitiam fidem caritatem pacem cum his qui invocant Dominum de corde puro

2 Timothy 2:23

stultas autem et sine disciplina quaestiones devita sciens quia generant lites

2 Timothy 2:24

servum autem Domini non oportet litigare sed mansuetum esse ad omnes docibilem patientem

2 Timothy 2:25

cum modestia corripientem eos qui resistunt nequando det illis Deus paenitentiam ad cognoscendam veritatem

2 Timothy 2:26

et resipiscant a diaboli laqueis a quo capti tenentur ad ipsius voluntatem