Exodus 30

Exodus 30:1

facies quoque altare in adolendum thymiama de lignis setthim

Exodus 30:2

habens cubitum longitudinis et alterum latitudinis id est quadrangulum et duos cubitos in altitudine cornua ex ipso procedent

Exodus 30:3

vestiesque illud auro purissimo tam craticulam eius quam parietes per circuitum et cornua faciesque ei coronam aureolam per gyrum

Exodus 30:4

et duos anulos aureos sub corona per singula latera ut mittantur in eos vectes et altare portetur

Exodus 30:5

ipsos quoque vectes facies de lignis setthim et inaurabis

Exodus 30:6

ponesque altare contra velum quod ante arcam pendet testimonii coram propitiatorio quo tegitur testimonium ubi loquar tibi

Exodus 30:7

et adolebit incensum super eo Aaron suave fraglans mane quando conponet lucernas incendet illud

Exodus 30:8

et quando conlocat eas ad vesperum uret thymiama sempiternum coram Domino in generationes vestras

Exodus 30:9

non offeretis super eo thymiama conpositionis alterius nec oblationem et victimam nec liba libabitis

Exodus 30:10

et deprecabitur Aaron super cornua eius semel per annum in sanguine quod oblatum est pro peccato et placabit super eo in generationibus vestris sanctum sanctorum erit Domino

Exodus 30:11

locutusque est Dominus ad Mosen dicens

Exodus 30:12

quando tuleris summam filiorum Israhel iuxta numerum dabunt singuli pretium pro animabus suis Domino et non erit plaga in eis cum fuerint recensiti

Exodus 30:13

hoc autem dabit omnis qui transit ad nomen dimidium sicli iuxta mensuram templi siclus viginti obolos habet media pars sicli offeretur Domino

Exodus 30:14

qui habetur in numero a viginti annis et supra dabit pretium

Exodus 30:15

dives non addet ad medium sicli et pauper nihil minuet

Exodus 30:16

susceptamque pecuniam quae conlata est a filiis Israhel trades in usus tabernaculi testimonii ut sit monumentum eorum coram Domino et propitietur animabus illorum

Exodus 30:17

locutusque est Dominus ad Mosen dicens

Exodus 30:18

facies et labium aeneum cum basi sua ad lavandum ponesque illud inter tabernaculum testimonii et altare et missa aqua

Exodus 30:19

lavabunt in eo Aaron et filii eius manus suas ac pedes

Exodus 30:20

quando ingressuri sunt tabernaculum testimonii et quando accessuri ad altare ut offerant in eo thymiama Domino

Exodus 30:21

ne forte moriantur legitimum sempiternum erit ipsi et semini eius per successiones

Exodus 30:22

locutusque est Dominus ad Mosen

Exodus 30:23

dicens sume tibi aromata prima et zmyrnae electae quingentos siclos et cinnamomi medium id est ducentos quinquaginta calami similiter ducentos quinquaginta

Exodus 30:24

cassiae autem quingentos siclos in pondere sanctuarii olei de olivetis mensuram hin

Exodus 30:25

faciesque unctionis oleum sanctum unguentum conpositum opere unguentarii

Exodus 30:26

et ungues ex eo tabernaculum testimonii et arcam testamenti

Exodus 30:27

mensamque cum vasis suis candelabrum et utensilia eius altaria thymiamatis

Exodus 30:28

et holocausti et universam supellectilem quae ad cultum eorum pertinent

Exodus 30:29

sanctificabisque omnia et erunt sancta sanctorum qui tetigerit ea sanctificabitur

Exodus 30:30

Aaron et filios eius ungues sanctificabisque eos ut sacerdotio fungantur mihi

Exodus 30:31

filiis quoque Israhel dices hoc oleum unctionis sanctum erit mihi in generationes vestras

Exodus 30:32

caro hominis non unguetur ex eo et iuxta conpositionem eius non facietis aliud quia sanctificatum est et sanctum erit vobis

Exodus 30:33

homo quicumque tale conposuerit et dederit ex eo alieno exterminabitur de populo suo

Exodus 30:34

dixitque Dominus ad Mosen sume tibi aromata stacten et onycha galbanen boni odoris et tus lucidissimum aequalis ponderis erunt omnia

Exodus 30:35

faciesque thymiama conpositum opere unguentarii mixtum diligenter et purum et sanctificatione dignissimum

Exodus 30:36

cumque in tenuissimum pulverem universa contuderis pones ex eo coram testimonio tabernaculi in quo loco apparebo tibi sanctum sanctorum erit vobis thymiama

Exodus 30:37

talem conpositionem non facietis in usus vestros quia sanctum est Domino

Exodus 30:38

homo quicumque fecerit simile ut odore illius perfruatur peribit de populis suis