James 4

James 4:1

unde bella et lites in vobis nonne hinc ex concupiscentiis vestris quae militant in membris vestris

James 4:2

concupiscitis et non habetis occiditis et zelatis et non potestis adipisci litigatis et belligeratis non habetis propter quod non postulatis

James 4:3

petitis et non accipitis eo quod male petatis ut in concupiscentiis vestris insumatis

James 4:4

adulteri nescitis quia amicitia huius mundi inimica est Dei quicumque ergo voluerit amicus esse saeculi huius inimicus Dei constituitur

James 4:5

aut putatis quia inaniter scriptura dicat ad invidiam concupiscit Spiritus qui inhabitat in nobis

James 4:6

maiorem autem dat gratiam propter quod dicit Deus superbis resistit humilibus autem dat gratiam

James 4:7

subditi igitur estote Deo resistite autem diabolo et fugiet a vobis

James 4:8

adpropiate Domino et adpropinquabit vobis emundate manus peccatores et purificate corda duplices animo

James 4:9

miseri estote et lugete et plorate risus vester in luctum convertatur et gaudium in maerorem

James 4:10

humiliamini in conspectu Domini et exaltabit vos

James 4:11

nolite detrahere de alterutrum fratres qui detrahit fratri aut qui iudicat fratrem suum detrahit legi et iudicat legem si autem iudicas legem non es factor legis sed iudex

James 4:12

unus est legislator et iudex qui potest perdere et liberare tu autem quis es qui iudicas proximum

James 4:13

ecce nunc qui dicitis hodie aut crastino ibimus in illam civitatem et faciemus quidem ibi annum et mercabimur et lucrum faciemus

James 4:14

qui ignoratis quid erit in crastinum quae enim est vita vestra vapor est ad modicum parens deinceps exterminatur

James 4:15

pro eo ut dicatis si Dominus voluerit et vixerimus faciemus hoc aut illud

James 4:16

nunc autem exultatis in superbiis vestris omnis exultatio talis maligna est

James 4:17

scienti igitur bonum facere et non facienti peccatum est illi