Proverbs 25

Proverbs 25:1

haec quoque parabolae Salomonis quas transtulerunt viri Ezechiae regis Iuda

Proverbs 25:2

gloria Dei celare verbum et gloria regum investigare sermonem

Proverbs 25:3

caelum sursum et terra deorsum et cor regum inscrutabile

Proverbs 25:4

aufer robiginem de argento et egredietur vas purissimum

Proverbs 25:5

aufer impietatem de vultu regis et firmabitur iustitia thronus eius

Proverbs 25:6

ne gloriosus appareas coram rege et in loco magnorum ne steteris

Proverbs 25:7

melius est enim ut dicatur tibi ascende huc quam ut humilieris coram principe

Proverbs 25:8

quae viderunt oculi tui ne proferas in iurgio cito ne postea emendare non possis cum dehonestaveris amicum tuum

Proverbs 25:9

causam tuam tracta cum amico tuo et secretum extraneo non reveles

Proverbs 25:10

ne forte insultet tibi cum audierit et exprobrare non cesset

Proverbs 25:11

mala aurea in lectis argenteis qui loquitur verbum in tempore suo

Proverbs 25:12

inauris aurea et margaritum fulgens qui arguit sapientem et aurem oboedientem

Proverbs 25:13

sicut frigus nivis in die messis ita legatus fidelis ei qui misit eum animam illius requiescere facit

Proverbs 25:14

nubes et ventus et pluviae non sequentes vir gloriosus et promissa non conplens

Proverbs 25:15

patientia lenietur princeps et lingua mollis confringet duritiam

Proverbs 25:16

mel invenisti comede quod sufficit tibi ne forte saturatus evomas illud

Proverbs 25:17

subtrahe pedem tuum de domo proximi tui nequando satiatus oderit te

Proverbs 25:18

iaculum et gladius et sagitta acuta homo qui loquitur contra proximum suum testimonium falsum

Proverbs 25:19

dens putridus et pes lapsus qui sperat super infideli in die angustiae

Proverbs 25:20

et amittit pallium in die frigoris acetum in nitro et qui cantat carmina cordi pessimo

Proverbs 25:21

si esurierit inimicus tuus ciba illum et si sitierit da ei aquam bibere

Proverbs 25:22

prunam enim congregabis super caput eius et Dominus reddet tibi

Proverbs 25:23

ventus aquilo dissipat pluvias et facies tristis linguam detrahentem

Proverbs 25:24

melius est sedere in angulo domatis quam cum muliere litigiosa et in domo communi

Proverbs 25:25

aqua frigida animae sitienti et nuntius bonus de terra longinqua

Proverbs 25:26

fons turbatus pede et vena corrupta iustus cadens coram impio

Proverbs 25:27

sicut qui mel multum comedit non est ei bonum sic qui scrutator est maiestatis opprimitur gloria

Proverbs 25:28

sicut urbs patens et absque murorum ambitu ita vir qui non potest in loquendo cohibere spiritum suum